ZITA bat FALTA zen

IMG_0847

 

 

 

 

 

 

 

 

 

 

 

 

 

ZITA

Hondartzako hondarra                                                                                                  erretzen hasten den lekuan                                                                                                 egin genuen zita.                                                                                                                 Uste dut                                                                                                                              egun horretan ikasi nuela                                                                                                     hitz horren esannahia

nire alturan jarri zinen,                                                                                                    makurtu gabe                                                                                                               begietara begiratu ahal izateko.                                                                                  eskuekin besoak heldu zenizkidan

maite zaitut,                                                                                                                  indartsua izan,                                                                                                                        itzuliko naiz, esateko.

Gutxi iraun zuen zitak,                                                                                                         oinak hondarrarekin erretzeko                                                                                                 astirik ez zen izan.                                                                                                                Nik banekien itzuliko zinela,                                                                                                baina itzuli zine arte                                                                                                          oinak eta bihotza                                                                                                                  izoztu zitzaizkidan,                                                                                                                             eta beti itzultzen naiz hara,                                                                                                oinak erretzeko beldurrik gabe,                                                                                              han galdu nuenaren bila.

 

Olatu artera doa FALTA (ez) diren gauzak

ERAKUSKETA.
Ainara Lasa Perez

Otsailaren 7tik martxoaren 2ra
Torre Luzea erakuskela
Kale nagusia
Zarautz

Ordutegia: Astelehenetik igandera, 18:00etatik 20:00etara.
Oharra: erakusketa 18:00etan zabalduko da otsailaren 7an eta nahi duzuenean etor zaitezkete, baina topa, 19:00etan egingo dugu ;-). 20:00ak arte egongo da zabalik.

eskuorria2

(…) eta itsasoa urdin beltzez janzten denean                                                                      topatzen zaituztet                                                                                                                    beti dut armairuan jaka urdinbeltz bat                                                                                    ez da orduko bera                                                                                                               baina zer axola dio                                                                                                     trasteleku bat eta irudimena                                                                                                  utzi zenizkidaten.

Mila esker Txokolo, ezer ez da FALTA izan

Mila esker hilabete honetan zehar Mikelazulotik “FALTA (ez) diren gauzak” erakusketa ikustera pasa zaretenei, zuen hitz ederrrak utzi dizkidazuenei, erakusketa tarteko ezagutu dudan jende berriari, hari berriak eman dizkidazuenei. Eta bihotzez, Txokolori. Urte amaiera ederra zinez. Hurrengo geltokia Zarautz, Otsailak 7 – martxoak 2. Torre luzea erakusgela.

Xalbador bertsolariak, emazte zenaren soinekoari:

Nekane Peñagarikanok gogorarazi zidan lehengoan irratian,                                     FALTAko soinekoez ari ginela.

Pentsa zazue alargundu bat
ez daike izan urusa,
dolamen hunek, oi!, ez dezala
anitz gehiago luza,
orai urtea ziloan sartu
andreñoaren gorputza,
haren arropa hantxet dilindan
penaz ikusten dut hutsa.

Geroztik nihaur ere nabila
guzia beltzez jantzirik,
ez dut pentsatzen nigar eiteko
ene begiak hersterik,
ez pentsa gero, andre gaixoa,
baden munduan besterik
zure arropa soinean
har dezaken emazterik.

Xalbador

IMG_1912

Mendi Urruzunoren bideo ederra, aurkezpenean jasotako irudiekin

Lagun haundiak ditut eta gauza haundia da hori. Mendi Urruzuno-k opari hau egin dit, “FALTA (ez) diren gauzak” erakuskeatren aurkezpen egunean jasotakoarekin. “Bidea eta denbora” (eskerrak (ahulak garen) Anari) behar izan ditut, baina ailegatu naiz, joateko.

Eskaintza bat FALTA zen

Jokoa eten zenean hasi zen FALTA. 1984ko ekainaren 15ean.

Egun horretan ez ginen laura iritsi.

Eraman zuten ama,  ihes egin zuen aitak, galdu nituen haurtzaroa, gorputza eta osabak.

Agur moketa gainean oinutsik osabekin jolasten emandako garaiari. Hainbat etxetan anai-arrebak, seme-alabak, gurasoak,… falta eta osaba-izebak bikoiztu ziren garaiari. Haur haiei esan nahi nieke neri kontutatu zizkidatela eurentzako ziren ipuinak, dena ez zela erabat galdu.

Joseba Sarrionandiari aspaldi “Ez diren gauzak” poema irakurri nionean hasi nintzen pentsatzen sentitzen nuenaz, hasi nintzen galdu nuen gorputzaren bila, hasi nintzen bila.

Ez izateko, ausentzia izateko, nire baitan leku asko hartzen zuen haren bila. 29 urte geroago askatu naiz, lotuz.

1984 hartan bezala orain,  1900ean Hendaian eraikitako Gaztelu zahar frontoian aurkitu ditut erantzunak. Eskuartean hainbestetan izan nituen pilota haietan, eta ulertu nuen paretak zuloa itzultzearekin hariak ere eman zizkidala, larruaren azpian zeudela hariak, hari nintzela.

Bizitza paraleloetan bizi izan ginen haurrei eskaini nahi nieke.

Gurasoei, gero dena ulertu genuela. Hau sentitu genuen hari kantu bat dela.

FALTA izan zitzaidan hark ere egin nauelako nauena.

Ausentziak handiak izan zirela gero, baina presentziak direla barruan gordeta, josita geratu zaizkidanak.

Eta Larraitzi, bidea elkarrekin egin genuelako.

Mina badoa soinekoekin hegan.